ഖത്തർ ലോകകപ്പും ക്യാൻസൽ കൾച്ചറും

ലാറ്റിനമേരിക്കൻ ക്ലബുകൾ ഒന്നും പഴയ പ്രഭയിൽ അല്ലാത്ത കാലത്ത്, കളിക്കാനായി ഇരുപതാം വയസ്സിൽ യൂറോപ്പിലേക്ക് ഒറ്റയ്ക്ക് വണ്ടികയറിയ, 28-ആം വയസ്സുവരെ ഒരു ഇംഗ്ലീഷ് ക്ളബ് ബഞ്ചിലിരുത്തി ഏതാണ്ട് കരിയർ തന്നെ നശിക്കുന്നതിന്റെ വക്കത്തെത്തിയ, പിന്നീട് ഒരു രണ്ടാം നിര ക്ലബ്ബായ ആസ്റ്റണ് വില്ലയിലേക്ക് മാറി കളിച്ചു തെളിഞ്ഞ്, സ്‌കളോണി പരീക്ഷിച്ച ആദ്യ 8 ഗോളികളിൽ ഒരാൾ അല്ലാതിരുന്ന, കോപ്പ അമേരിക്കക്ക് മുൻപ് അർമാണിക്ക് പരിക്കേറ്റതുകൊണ്ട് മാത്രം നാഷണൽ ടീമിൽ അവസരം കിട്ടി, ടീമിന് ലോകകപ്പ് കിട്ടുന്നെങ്കിൽ വലിയ പങ്കു വഹിക്കുന്നതിൽ വരെ എത്തിനിൽക്കുന്ന  കളിക്കാരനാണ് എമിലിയാനോ മാർട്ടിനെസ്. അങ്ങേർക്ക് യൂറോപ്യൻ ഫുട്‌ബോളിന്റെ മഹത്വത്തെപ്പറ്റി കേൾക്കുമ്പോൾ, അതും യൂറോപ്യൻ ക്ലബ് ഫുട്‌ബോളിന്റെ സർവ്വ സൗകര്യങ്ങളും ചെറിയ പ്രായത്തിൽത്തന്നെ ലഭിച്ച, മെസ്സിയുടേയും നെയ്മറിന്റെയും പാസുകളിൽ നിന്ന് എല്ലാ ആഴ്ചയും ഗോളടിച്ചു കൂട്ടുന്ന, ലോകത്തേറ്റവും പ്രതിഫലം ഓഫർ ചെയ്യപ്പെട്ടിട്ടും നെയ്മറെയും മറ്റ് ലാറ്റിനമേരിക്കൻ കളിക്കാരെയും ടീമിൽ നിന്ന് മാറ്റിയാലെ താൻ പുതിയ കരാർ ഒപ്പുവെ‌ക്കൂ എന്നു വാശി പിടിക്കുന്ന, ഇപ്പോഴും അതിന്റെ പേരിൽ PSG വിടുമെന്ന് നിരന്തരം ഭീഷണി മുഴക്കുന്ന ഒരാളിന്റെ വായിൽ നിന്ന് അത് കേൾക്കുമ്പോൾ പുച്ഛം തോന്നിയില്ലെങ്കിലെ അൽഭുതം ഉള്ളൂ. വോക്ക് പൊലിറ്റിക്സിനും ക്യാൻസൽ കൾച്ചറിനും പെട്ടൊന്നൊരു ദിവസം വന്ന് അങ്ങനെ റദ്ദാക്കിക്കളയാവുന്നതല്ല മനുഷ്യന്റെ ജീവിത പരിസരങ്ങളും ചരിത്രവും.

ഒരു നൂറ്റാണ്ടിന്റെ ലോകകപ്പ് ചരിത്രത്തിൽ ആദ്യമായി മിഡിൽ ഈസ്റ്റിൽ ഒരു ലോകകപ്പ് നടത്താൻ തീരുമാനിച്ചപ്പോൾ മുൻപ് അവിടെ ബോംബിടാനും, എണ്ണ കൊണ്ടുപോവാനും മാത്രം വന്നിരുന്ന, അവിടെ ഉണ്ടായിരുന്ന പ്രോഗ്രസ്സീവായ ഭരണകൂടങ്ങളെ മുഴുവൻ അട്ടിമറിച്ച ചരിത്രമുള്ള യൂറോപ്യൻമാർ മോറൽ സുപ്പീരിറ്റിയുമായി പറന്നിറങ്ങി. യൂറോപ്യൻമാരുടെ കൊളോണിയൽ പാസ്റ്റിന് ഇനി ഒരു മുവ്വായിരം വർഷം കഴിഞ്ഞാലും ഒരു മോറൽ സുപ്പീരിറ്റിയും കിട്ടില്ല എന്നുപറഞ്ഞു ഫിഫ പ്രസിഡന്റ് അവർക്ക് കണ്ടത്തിലേക്കുള്ള വഴി കാണിച്ച്‌കൊടുത്തു. പിന്നെ ഫുട്‌ബോൾ സുപ്പീരിയോറിറ്റി പറഞ്ഞു നടന്ന പ്രമുഖ യൂറോപ്യൻ രാജ്യങ്ങളെയൊക്കെ ആഫ്രിക്കൻ, ഏഷ്യൻ, ലാറ്റിനമേരിക്കൻ രാജ്യങ്ങൾ പഞ്ഞിക്കിടുകയും ഒരു ലാറ്റിനമേരിക്കൻ രാജ്യം കപ്പെടുക്കുകയും ചെയ്തപ്പോൾ അതുവരെ ലാറ്റിനമേരിക്കൻ ഫുട്ബോളിനെ അധിക്ഷേപിച്ചു  നടന്നവരുടെ വക വോക്ക് പൊളിറ്റിക്സ് ആയി, മെസ്സിക്കൊരു കപ്പ് യോജനയായി, ക്യാൻസൽ കൾച്ചർ ആയി.

ഇനി മുതൽ സർവ്വം തികഞ്ഞ പുരുഷോത്തമാന്മാരായ യൂറോപ്യൻമാരും, അമേരിക്കയും കൂടി സ്വന്തം നാട്ടിൽ മാത്രം ലോകകപ്പ് നടത്തി, അത് സ്വന്തമായി വീതിച്ചു എടുത്തോളീ. ബാക്കിയുള്ളവർക്ക് കുറച്ചു സമാധാനം കിട്ടുമല്ലോ. 🙏